„ასტონ ვილამ“ კოუტინიო დაიმატა

ბრაზილიელი ფეხბურთელი ბირმინგემის ბანაკში სამუდამოდ დარჩება.

„ასტონ ვილამ“ ფილიპე კოუტინიოს „ბარსელონადან“ ტრანსფერის შესახებ განაცხადა. განცხადება ინგლისური კლუბის ოფიციალურ ვებგვერდზე გამოქვეყნდა.

„ვილანსმა“ ტრანსფერის ღირებულება არ გაამხილა, თუმცა განაცხადა, რომ ბრაზილიელმა ფეხბურთელმა კონტრაქტი 2026 წლამდე გააფორმა.

Transfermarkt-ის მონაცემებით, კატალონიელებმა ამ გარიგებიდან 20,000,000 ევრო გამოიმუშავეს. აღსანიშნავია, რომ „ბარსამ“ ფეხბურთელში 2018 წლის იანვარში უზარმაზარი თანხა - 135 მილიონი ევრო გადაიხადა.

კოუტინიო „ასტონ ვილას“ 2022 წლის ზამთარში იჯარით შეუერთდა. მან 16 მატჩში ოთხი გოლი და სამი საგოლე გადაცემა გააკეთა.