„შახტარის“ ნახევარმცველს „ბაიერ ლევერკუზენში“ გადასვლა სურს

დონეცკის „შახტარის“ ფეხბურთელი მიხაილ მუდრიკი შესაძლოა „ბაიერ ლევერკუზენში“ აღმოჩნდეს. თავად ნახევარმცველი იმედოვნებს, რომ „ლევერკუზენში“ გადავა.

„მე „შახტარის“ ფეხბურთელი ვარ, მაგრამ თუ კლუბი „ბაიერის“ შეთავაზებას მიიღებს, ბედნიერი ვიქნები. ზუსტად ვიცი, რომ ეს ერთადერთი გუნდია, რომელშიც გადასვლა მსურს“, - ციტირებს „შახტარის“ ფეხბურთელის სიტყვებს „სპორტარენა“.

მანამდე, Sky Sport Germany-მ გაავრცელა ინფორმაცია, რომ ბაიერი მზად იყო უკრაინელი ფეხბურთელის ტრანსფერში 20 000 000 ევრო გადაეხადა.

მუდრიკი დონეცკის კლუბის აკადემიაში გაიზარდა. მან „შახტარში“ დებიუტი 2018 წლის ოქტომბერში შეასრულა. ამ სეზონში 21 წლის ფეხბურთელმა 19 მატჩი ჩაატარა, ორი გოლი გაიტანა და ცხრა საგოლე გადაცემა გააკეთა.

ნახევარმცველის კონტრაქტი „შახტართან“ 2026 წლის ბოლომდეა გათვლილი. მუდრიკის ღირებულება 4,2 მილიონი ევროა (Transfermarkt.de-ს მიხედვით).