„სპარტაკის“ თავდამსხმელმა ლარსონმა განაცხადა, რომ რუსეთში დაბრუნება არ სურს.

ჯორდან ლარსონი, რომელიც სეზონის მეორე ნახევარს იჯარით აიკში ატარებს, რუსეთში დაბრუნებას არ გეგმავს.

„არ ვიცი, როგორ განვითარდება მოვლენები. თუმცა, მგონია, რომ რუსეთში არ დავბრუნდები. მოქმედი კონტრაქტი მაქვს, რამაც შეიძლება გარკვეული გართულებები გამოიწვიოს, მაგრამ „სპარტაკში“ დაბრუნებას არ ვგეგმავ. კლუბთან პირდაპირი კონტაქტი არ მაქვს; ყველა მოლაპარაკებას ჩემი აგენტი აწარმოებს“, - ციტირებს თავდამსხმელის სიტყვებს „აფტონბლადეტი“.

„აიკმა“ ლარსონი იჯარით 2022 წლის აპრილში დაიმატა. თავდამსხმელმა შვედურ გუნდში ცხრა თამაში ჩაატარა, ორი გოლი გაიტანა და ორი საგოლე გადაცემა გააკეთა. „აიკ“-ის პრეზიდენტმა რობერტ ფალკმა ადრე განაცხადა, რომ კლუბს სეზონის ბოლოს თავდამსხმელის მუდმივი ტრანსფერის დასასრულებლად სახსრები არ ჰქონდა.

ლარსონის კონტრაქტი მოსკოველებთან 2023 წლის ზაფხულამდეა ძალაში.