იანუზაი და მონრეალი რეალ სოსიედადს ტოვებენ

მხარეებმა ახალი კონტრაქტები არ გააფორმეს.

„რეალ სოსიედადი“, რომელმაც ლა ლიგის ცხრილში მეექვსე ადგილი დაიკავა და ევროპა ლიგაზე თამაშობდა, რამდენიმე წამყვანი ფეხბურთელის გარეშე დარჩა.

როგორც „თეთრ-ლურჯების“ პრესსამსახური იტყობინება, ვინგერმა ადნან იანუზაიმ და მცველმა ნაჩო მონრეალმა კლუბში თამაში შეწყვიტეს.

ცნობილია, რომ „რეალ სოსიედადის“ ხელმძღვანელობა ფეხბურთელებთან მოლაპარაკებებს გარკვეული პერიოდის განმავლობაში აწარმოებდა, თუმცა კონსენსუსის მიღწევა ვერ შეძლეს.

27 წლის ბელგიელმა ამ სეზონში ყველა ტურნირზე 44 მატჩი ჩაატარა, ხუთი გოლი გაიტანა და სამი საგოლე გადაცემა გააკეთა. 36 წლის ესპანელმა ტრავმის გამო მთელი სეზონი გამოტოვა.

Transfermarkt ფეხბურთელებს, შესაბამისად, 12 და 1,2 მილიონ ევროდ აფასებს.