„ბარსელონას“ ვინგერმა დემბელემ პსჟ-ს შეთავაზება მიიღო.

AS-ის ცნობით, უსმან დემბელე პარი სენ-ჟერმენს შეუერთდება.

წყაროს ცნობით, ვინგერი პარიზელების მიერ შეთავაზებულ პირობებს დათანხმდა. ფრანგის კონტრაქტი „ბარსელონასთან“ 2022 წლის ივნისში იწურება, ამიტომ ის „პსჟ“-ში თავისუფალი აგენტის სტატუსით გადავა.

უსმანმა კატალონიელ ფეხბურთელებს გუნდიდან წასვლის შესახებ უკვე აცნობა.

დემბელე „ბარსელონაში“ 2017 წლიდან თამაშობს. „ბლაუგრანასთან“ ერთად მან ორჯერ მოიგო ლა ლიგა და კოპა დელ რეი, ხოლო ერთხელ ესპანეთის სუპერთასი. 2021/2022 წლების სეზონში 25 წლის ფრანგმა 32 მატჩი ჩაატარა, ორი გოლი გაიტანა და 13 საგოლე გადაცემა გააკეთა.

2018 წელს დემბელე საფრანგეთის ნაკრებთან ერთად მსოფლიო ჩემპიონი გახდა.