„ჩელსიმ“ ნახევარმცველი საულის წასვლის შესახებ განაცხადა.

საულ ნიგესი ამ ზაფხულს ატლეტიკო მადრიდში დაბრუნდება, რადგან მისი იჯარის ხელშეკრულება „ჩელსისთან“ ამოიწურა. ამის შესახებ ინფორმაცია კლუბის ვებსაიტზე გამოქვეყნდა.

გასულ ზაფხულს ლონდონელებმა 27 წლის ნახევარმცველი ერთწლიანი იჯარით დაიმატეს. მას შემდეგ მან „ლურჯების“ რიგებში 25 მატჩი ჩაატარა და ერთი გოლი გაიტანა. ესპანელის თამაშებმა „ჩელსის“ დირექტორთა საბჭო ვერ დაარწმუნა და კლუბმა საბოლოოდ გადაწყვიტა, რომ ნახევარმცველის 36 მილიონი ევროს სანაცვლოდ გამოსყიდვის ოფცია არ გამოეყენებინა.

საული „ატლეტიკო მადრიდის“ ახალგაზრდული სისტემის აღზრდაა. მისი კონტრაქტი „მატრასების შემქმნელებთან“ 2026 წლის ივნისამდეა გათვლილი. ნახევარმცველის საბაზრო ღირებულება 35 მილიონი ევროა (Transfermarkt.de-ს მიხედვით).

საული ესპანეთის სხვადასხვა ასაკობრივი ჯგუფის ნაკრებებში თამაშობდა, ხოლო 2016 წელს დებიუტი ქვეყნის მთავარ გუნდში შეასრულა.