ინფანტინოს რუსეთის მთავრობის კერძო თვითმფრინავების გამოყენებაში ადანაშაულებენ.

ფიფას პრეზიდენტი ჯანი ინფანტინო რუსეთის მთავრობასთან დაკავშირებულ კერძო თვითმფრინავებს იყენებდა. შესაძლებელია, რომ მათ შორის რუსეთის პრეზიდენტ ვლადიმერ პუტინის თვითმფრინავებიც ყოფილიყო , იტყობინება The Telegraph.

გამოცემის ცნობით, ინფანტინოს მიერ დარღვევები ფიფას პრეზიდენტად არჩევისთანავე დაიწყო. კერძოდ, თანამდებობის პირმა გამოიყენა თვითმფრინავი, რომელსაც კავშირი ჰქონდა რუსეთის სამთავრობო უწყებებთან.

ინფანტინომ ფიფას პრეზიდენტის თანამდებობა 2016 წლის თებერვალში დაიკავა. სულ რამდენიმე თვის შემდეგ, ივნისში, ფიფას მაღალჩინოსნებმა ახალი პრეზიდენტის ქმედებებთან დაკავშირებით უკმაყოფილება გამოთქვეს. გამოძიების შემდეგ, ფიფას ეთიკის კომისიამ გამოძიება ჩაატარა, თუმცა მისი დასკვნები სრულად ჯერ არ გამოქვეყნებულა.

ეს არ იყო ერთადერთი ინციდენტი, რომელმაც ინფანტინოს შესახებ კითხვები გააჩინა. სხვა საჩივრებს შორის იყო დედასთან ერთად რომის პაპთან შესახვედრად მოგზაურობა, რომელიც ფიფას მიერ იყო დაფინანსებული. გარდა ამისა, ინფანტინომ უარი თქვა შეთავაზებულ 2,1 მილიონ ევროს ხელფასზე, რადგან ის არასაკმარისად მიიჩნია და ასევე დაადანაშაულეს თანამშრომლების გაბერილი ხელფასებით თანამდებობებზე დანიშვნაში.

ამ ბრალდებების მიუხედავად, ფიფას პრეზიდენტის წინააღმდეგ სანქციები არ დაკისრებიათ. უფრო მეტიც, თავად ინფანტინოს წინააღმდეგ ბრალდებები შემდგომში მოიხსნა.

ფიფას პრეზიდენტი კვლავ კრიტიკის ქვეშაა. მსოფლიო ჩემპიონატის პრივატიზაციის გეგმის ჩავარდნის შემდეგ მასზე ზეწოლა გაძლიერდა.